Paulan Ama Kut Ngeia A Ziah

PAULAN AMA KUT NGEIA A ZIAH

Sunday September 24, 2017

Paulan Galatia 6:11–18-a thukhârna a siam hi a lehkhathawn danga thukhârna a siamte nên khaikhin la.

Engtiang kawngin nge Galatia Lehkhathawn tâwp dân hi a lehkhathawn dangte tâwp dân nêna a inan a, danglam bîk bawk le?

(Rome, 1 leh 2 Korin, Efesi, Filipi, Kolosa, 1 leh 2 Thesalonika khârna atâna thu hmante hi en la) ______________________________________________________________________________________________________________________

Paulan a lehkhathawn khârna atâna țawngkam a hmante hi inang diak diak vek lo mah se, thil thuhmun lo lang ziah țhîn erawh eng emaw zât a awm.

Chûngte chu:
1) tu tute emaw chibai a bûkna thu te,
2) fuihna thu hnuhnûng te,
3) ama hming leh
4) malsâwmna thute a ni.

Galatia Lehkhathawna a khârna țawngkam a hman hi han thlîr ila, thil danglam bîk pahnih kan hmu ang.

A hmasa zâwk chu, a lehkhathawn dangte ang lo takin Galatia Lehkhathawn ah hi chuan mi mal taka chibai inbûkna a awm ve lo tlat.

Eng vâng nge ni ang?

A lehkhathawn tîr lamah pawh khân lâwmthu sawina țawngkam engmah a awm hran lo a nihkha, hei hian Paula leh Galatia khuaa ringtute inkâra inlaichînna hi a țha vak lo a ni tih a tilang.

Pahnihna chu, Paula hian a lehkhathawn hi mi dang tu emaw ziahtîr a chîng hle tih kan hre reng tûr a ni a (Rome 16:22).

Chu mi chuan a ziah zawh hnu-ah, amah Paula hian a khârna thutâwi tê a ziak ve leh țhîn (1 Korin 16:21).

Galatia Lehkhathawn a ziah ţum erawh hi chuan a tih țhin dân ang ni lovin a ti a.

A lehkhathawn ziaktu kut ațanga pen a lâk hnuah pawh Galatia Kohhrana thil thleng chuan a rilru a la luah hneh êm êm tho avângin a khârna thu pawh țum dang zawng âiin a ziak sei ta deuh rêng a. An kawng zawh mêk âtthlâk tak ațanga kîr leh tûra ngennathu a ziah hma loh chuan a pen a dah thei ngang lo a ni ber.Galatia 6:11-ah hian Paula chuan hawrawp hraw pui pui hmanga lehkha a ziah thu a sawi deuh kher a.

Mi țhenkhat chuan Paula hian a hawrawp hman len leh len loh lam ni lovin, a hawrawp a chhiat hle thu a sawi zâwk niin an ngai a.

Tihduhdahna a tawrhte avâng khân a kut a silawng zo tawh a, anih loh pawhin, puan in a siamna lamah a kut sawrbâwk zo tawh pawh a ni mai thei bawk, chuvângin a ziah duh dân ang tak pawhin a ziak hlei thei ta lo a ni an ti.

Mi țhenkhat dang chuan hetianga liana a ziahna chhan chu a khawhmuh fiah tâwk tawh loh vâng niinan ring ve thung a.

A khawi pawh hi a thil ni thei ve ve chu ni tho mah se, hawrawp lian tak tak a hmanna chhan hi a thusawi tum chu a pawimawh a, hre ngei se a duh vâng a nih a rinawm ber a.
Keini pawhin kan thu ziaka a pawimawh lai chu a hnuaiah kan rîn phei a, hawrawp âwnten (italics) kan ziak bîk a, a nih loh pawhin HAWRAWPPUI (CAPITAL LETTERS) te kan hmang țhîn a nih hi.A enga pawh chu lo ni se, Paula hian alehkhathawn lo chhiartute chu a vaukhânna leh a zilhna thute ngaihsak tûrin a duh a ni tih a chiang hle a ni.

Dan Thu Zawng Zawng Zawmin

DÂN THU ZAWNG ZAWNG CHU ZÂWMIN ( GALATIA 5:13-15)

Engtin nge Galatia 5:3-a dân thu zawng zawng zawm vek a sawi hnâwmna hi Galatia 5:14-a a sawi mâwi leh si-na nên hian kan sawi rem theih ang? Rome 8:4; 10:5; 13:8; Galatia 3:10, 12; 5:3, 14 te pawh en la.____________________________________________________________________________________________

Mi tam tak chuan dân thu zawng zawng zawm vek a sawi hnâwmna leh a sawi mawina te hi thil inkâwlkalh tak, dik ve ve thei tho ni bawk si ang chi hi niin an ngai a.

Mahse a ni lo.

Paula hian Kristian nun leh dân inlaichînna sawi fiah dân kawng pahnihte inan lohna târlan nân he ţawngkam hi a hmang ve ve tih hriat tûr a ni a.

Entîr nân, Kristiante chuan dân an zâwm tûr a ni tianga sawina rêng rêngahte hian *“dânina phûtte ti”* tih angin a sawi ngai lo rêng rêng a.

He ţawngkam hi chu dân hnuaiaawmte leh dânin a phût thilte “ti-a” Pathian pawm tlâk nih khêlte nungchang sawi nân chauh a hmang ţhîn a ni.

Mahse hetianga kan sawi avâng hian Kristaa chhandamna lo neite chuan dân an zâwm lo kan tihna erawh a ni lo. Paula pawhin dân an “zâwm famkim” niin a sawi a.

A sawi awmzia chu, Kristian nungchang dik tak chu dânin a phûtte pâwn lam lang theia “tih” ang mai lo deuh hi a ni a tihna a ni zâwk.
Paula hian “tifamkim”tih țawngkam a hmang a, a chhan pawha tih a tih aia thûk daih zâwk a nih vâng a ni.

Hetiang thuâwihna hi chu Isua Kristaa zung kaih tlat a ni a (Mat. 5:17).

Dân thlauh thlâkna a ni lo va, hmangaih tûra dân sawi hnâwmna lah a ni hek lo; ringtuten dân zawng zawngin a tum diktak leh awmze dik tak an lo hriat theihna tûr a ni zâwk a ni.

Paulan dân awmze famkim hmuh theihna tûr a sawi chu khawiah nge a awm le?

Leviticus 19:18; Matthaia 19:19; Marka 12:31, 33; Rome 13:9; Jakoba 2:8.______________________________________________________________________________________________________________________

Paula hian Leviticus 19:18 thu a sawi chhâwng chu ni tho mah se, a sawi chhâwn chhan tak erawh chu Isua pawhin a lo sawi chhâwn ve tawh vâng a ni a.

Amaherawh chu, Isua kha Juda sakhaw zirtîrtute zînga dân thu zawng zawng khaikhâwmna atâna Leviticus 19:18 thu hmangtu awm chhun a ni lo va.

Isua pian hma daiha mi, Rabbi Hillel-a pawhin ti hian alo sawi tawh a:“Nangma ngaiha huatthlala chu i vêngte chungah pawh ti bîk suh; chu chu dân thu zawng zawng khaikhâwmna a ni” tiin.

Mahse Isua thlîr dân erawh a dang khawp mai (Mat.7:12).

Dân thu zawng zawng zawm vek a sawi mâwi a ni mai lo va, dân leh hmangaihna te hi thil inrem lo a nih loh dân pawh a târlang nghâl bawk.

Hmangaihna tel lo chuan dân hi thil ruak leh khirh tak a ni ringawt a; chutiang bawkin dân tel lo chuan hmangaihna hian kalna tûr lam a nei lo hrim hrim bawk a ni.

Mi dangte hmangaih nge awlsam zâwka Thu Sâwm Pêk zawm?

Eng vânga awlsam zâwknge a nih?
I chhânna chu in pâwlah i sawi dâwn nia.

Thlarau Rah Chu

THLARAU RAH CHU (GALATIA 55:22-24)

“Thlarau rah erawh chu hmangaihna te,hlimna te, remna te, dawhtheihna te, ngilneihna te, țhatna te, rinawmna te, thuhnuairawlhnate, insûmtheihna te, a ni zâwk e; chutiang kalh zâwngin Dân thupêk rêng a awm lo ve” (Galatia 5:22, 23).

Engtiangin nge Thu Sâwm Pêkte zawmna hian Thlarau rah chu a târlan le? (Matthaia 5:21, 22, 27, 28; 22:35–40en la.)______________________________________________________________________________________________________________________

Thu Sâwm Pêkte hi hmangaihna luahlân tûra pêk a ni lo va; hêngte hian Pathian leh kan mihringpuite kan hmangaihna chu engtianga lan chhuahtîr tûr nge tih min kawhhmuh zâwk a ni.

Hmangaihna chu dân ziakna hawrawp âia thûk zâwk daih ni tho mahse, dân nêna inkalh chu a ni chuang lo va.

Pathian kan hmangaihna leh kan țhenawm khawvêngte kan hmangaih tawh ber chuan Thu Sâwm Pêkte hi zawm a ngai hleinêm tih ang ngaihdân hi chu khawvêl leh a chhûnga thil awmte kan duat chuan leilung dân kan zah a ngai tawh kher lo tih ang vêla awmze nei lo a ni.

Tîsa thiltihte nihphung hrang hrang chu thumal sâwm leh panga lai hmanga a sawi laiin, Thlarau rah erawhchu thumal țha leh mawi tak tak pakua hmangin a sawifiah ve thung a.

Mi thiamte chuan hêng nungchang țha chihrang hrang pakuate hi hlâwm thuma țhen hran theih niin an ngai a; mahse hlâwm thuma țhen a nih chhanah erawh an ngaihdân a thuhmun vek chuang lo.

Țhenkhat chuan hlâwm thuma țhen hian Pathiana minung pathum awmte aentîr niin an ngai a;țhenkhat dang chuan Pathian kan hmangaihna te, kan țhenawm khawvêngte kan hmangaihna te,leh a tâwp berah keimahni kan inhmangaihna te a entîr niin a ngai ve thung; țhenkhat dang leh chuan Isua nungchang sawifiahna niin a ngai bawk.

Hêng ngaihdân hrang hrangte hi țha hlawm vek tho mah se, thil pawimawh tak kan hmuh hmaih hauh loh tûr chu Kristiante nuna hmangaihnain hmun pawimawh ber a chan thu Paulan a sawi hi a ni.

Paulan nungchang țha leh mâwi hrang hrang a sawia hmangaihna dah hmasa ber hi tihpalhthil thu a ni lo va. Galatia 5:6-ah leh 13-ah pawh Kristian nuna hmangaihnain hmun a chan thûkzia a lo sawi tawh a, hmun danga nungchang țha leh mâwi hrang hrang asawiah pawh a telh ve zêl bawk a ni (2 Korin 6:6; 1 Timothea 4:12; 6:11; 2 Timothea 2:22).

Hêng nungchang țha asawi zînga a dang zawng hi chu Kristian ni ve lote thuziakahte pawh a awm ve vek a; hmangaihna bîk hi chu a Kristian hliah hliah a ni.

Hei hian hmangaihna chu nungchang țha leh mâwi hrang hrang zînga pakhat ni ve satliah mai lovin, Kristianten an neih ngei tûr nungchang ropui tak, nunchang țha leh mâwi dang zawngte innghahna ni bawk a ni tih a tilang.

Hmangaihna chu Thlarau rah hrang hrang zînga a langsâr ber a ni a (1 Korin 13:13; Rome 5:5), hmangaihna lan chhuahtîr chu a harsat châng awm ţhîn tho mah se, Kristian tinte nun dân leh ngaihtuahna hrilhfiahtu ber a ni zêl tûr a ni (Joh. 13:34, 35).

Hmangaihnaah hian engtianga nasa nge mahni inphatna awm le?

Mahni inphat miah lovin mi dang i hmangaih thei em?

Hmangaihna leh mahni inphat chungchânga Isua min zirtîr kha eng nge ni?

Hagari Leh Sinai Tlang

HAGARI LEH SINAI TLÂNG (GAL. 4: 21-31)

Pathianin Sinai Tlânga a mîte nêna thuthlung leh inlaichîna din a tum kha eng ang nge ni?

Pathianin Abrahama hnêna thu a tiam nên khân eng nge inanna a neih neih?

Exodus 6:2–8, 19:3–6; Deuteronomi 32:10–12.

Pathian chuan Abrahama hnêna thuthlung inlaichînna a pêk ang kha Sinai tlâng bulțhuta pungkhâwm Israel mîte hnênah pawh pêk ve leh a duh a.

Dik tak phei chuan Pathianin Abrahama hnêna thil a sawite (Genesis 12:1–3) leh Mosia hnêna a sawite (Exodus 19) hi a inannalai a tam hlê. A khawi ve ve-ah pawh hian Pathian chuan a mîte tâna thil tih atumte chu a sawi uar ber a ni a. Israel mîte kha a malsâwmna hlawh chhuak tûr thil eng emaw tih intiam tûrin a hrilhlo va; chûng malsâwmnate chu an dawn tâk avânga a thu zâwm mai tûrin a hrilh zâwk a ni.

Exodus 19:5-a “zawm” (to obey) tia Sap țawng Bible tam zâwkin (e.g., KJV, NKJV) an lehlin hi a Hebrai thumalin a kawh tak chu “ngaithla” tih a ni a, Mizo Bible hian a let chhuak dik chiah a ni. Pathian thute hian thil tih țhat hmanga felna hlawh chhuah asawi lo va. Chuti ahnehin, Pathian chuan a mi Israel-te kha a thutiamte chhâng tûra Abrahaman rinna a neih ang kha nei ve tûrin a duh a ni zâwk.

Sinai Tlânga Pathianin Israel mîte pêk atum thuthlung inlaichînna kha Abrahama hnênaa lo pêk tawh nên thuhmun reng a nih chuan eng vângin nge Paula hian Sinai tlâng chu Hagari thil tawn țha lo tak nênkhân a sawi zawm tlat si? 

Exod. 19:7–25; Heb. 8:6, 7.

Sinai Tlânga din thuthlung kha mihringte sualzia tilang tûr leh a tihdam nâna Pathian khawngaihna sân zia hriattîrna atâna pêk a ni a,  chu chu biak bûk rawngbâwlnate khân an entîr bawk. Sinai tlâng thuthlung a kal tluan tâk lohna chhan kha chu Pathian lamah fel lo eng emaw a awm vâng lam ni lovin, Israel mipuiten thutiam dik lo an tiam vâng zâwk a ni a (Heb. 8:6).

Inngaitlâwm tak chung leh rinna nêna Pathian thutiam chu chhâng lêt ta mai lovin, mahni inringtâwk takin, “LALPA sawi zawng zawngte chu kan ti zêl ang e” tiin an chhâng a nih kha (Exod. 19:8).

Aigupta sala kum zali chuang zet an tân hnu kha chuan Pathian ropuizia hriatna dik tak pawh an nei tawh lo va, anmahni sualna thûkzia pawh an hmu thei tawh bawk hek lo.

Abrahama leh Sari ten anmahni duh dâna Pathian thutiamte tihhlawhtlin an lo tum ve ngawt ang chiah khân, Israel mîte pawhin Pathian khawngaihna thuthlung chu thil țha tih avânga chhandamna hlawh chhuah tumna thuthlungah chhuah an tum a. Hagari khân Sinai Tlânga thil thleng hi entîrin, mihringte thil ţha tih hmanga chhandamna hlawhchhuah a tum țhin dân a pho lang a ni.

Paula hian Sinai Tlânga pêk dân kha a țha lo tiin emaw, tihbân a ni ta tiin emaw a sawi lo va. Galatia khuaa mi țhenkhatten dân nihna dik tak an hre sual tlat mai kha a vei ber chu a ni zâwk.

“Dân zawm țhat avânga Pathian lawmzâwng nih theih a nih loh chianzia hriatna atâna hmang ta lovin, Pathian tihlâwm nâna mahni theihnaa innghah tumna an neih phah ta hlauh zâwk a.

Chuvâng chuan dân pawhin Juda sakhuaa inlet tûra Jentail-te kar chîngho (Judaizers) pawh Krista lamah a hruai thei ta lo rêng a; hruai a hnehin kawng a khârsak ta zâwk nghe nghe a ni.”— O. Palmer Robertson, The Christ of the Covenants (Phillipsburg, N.J.: Presbyterian and Reformed Publishing Co., 1980), p. 181.