LALPAN MIN TIR

*"Tichuan, Ka Tir A Che U"* Chanchin Țha Johana ziak hian thlan ata Isua a thawh leh hnu khan pindan chungnungah a zirtirte nen an inhmuh thu a sawi a; tiin, Lukan a sawi lan ve loh thil dang sawi a nei bawk. *Johana sawi danin, Isua khan engti kawngin nge ringtute hnathawh tur a sawifiah? Johana 20:21 en la.* Isua khan he thu hi a hma pawhin a lo sawi tawh a: *"Nangin khawvela kei mi tir ang khan, kei pawhin anni chu khawvelah ka tirh hi,"* tiin . (Johana 17:18). Mi tu emawin mi dang tu emaw a tir a nih chuan, a tirtu chuan a tirha chungah thu a nei tihna a ni a. Tin, *"tir"* tih chuan thil eng emaw a hlen chhuah tur a awm tih a kawk bawk. Isua chu khawvel chhandamtu turin Pa-in a tir a. (Johaha 3:17). Keini pawh hi Isuan amah kaltlanga chhandamna thu puang turin min tir ve a ni. Tichuan, Krista hnathawh chhunzawm zel tura thu pek kan ni tih chu a chiang mai a, mi zawng zawng hnenah rawngbawlna kan hlenchhuah a țul dawn tihna a ni. (Matthaia 9:35). A nihna takah chuan, Kristan bul a lo țan tawh chu chhunzawm ve tur ni mai lovin, a aia asa zawka thawk turin min beisei a. *"tu pawh mi ring chuan thil ka tih ang hi a ti ve ang; hei aia ropui zawk pawh hi a la ti ang,"* tiin Isua chuan a sawi a ni. (Johana 14:12). Chutiang taka zirtirten an thawh theih nan chuan Thlarau Thianghlim a chantir ta a. Mihringte a siam lai khan Pathian chuan Adama hnarah nunna thaw a thaw lut a nih kha (Genesis 2:7). Khatiang deuh khan Isua chuan zirtirte chungah Thlarau Thianghlim a thaw lut a (Johana 20:22). Nunna thaw-in nunna nei lo hlum mai chu mi nungah a chantir ta ang bawk khan, Thlarau Thianghlim chuan hlauhna leh beidawnnaa khat zirtirte chu Isua hnathawh chhunzawm zelna atana thuhretu nung leh thiltithei takah a siam ta a. Kan hnena pek mawhphurhna (Chanchin Țha puan darh hna) hi kan hlen chhuah theih nan he thlarau thihna bawk hi a trul hle a ni. *"A thuhretu ni turin Isuan a ko che a. Eng thu chu nge i hriarpui tur chu ni? Chu mi awmzia chu, Isua chungchanga mi dangte hrilh chhawn ve tur chi engte nge ilo hmuha i lo tawn ve tawh le?*