Leiba Nge Khawngaihna Zawk

LEIBA NGE KHAWNGAIHNA ZAWK?

Heti laia Paula thu khel hi Pathian thu hrilhfiahna (theology) a ni satliah ve ngawt lo va. Chhandamna laimu leh bulpui ber bakah, Pathian nena kan inlaichinna pawh a khawih tel tlat.

Pathianin min pawmna chu a hlawha hlawh chhuah tur ni-ah kan ngai tlat a nih chuan–chutiang ngaihdan neih thei tur chuan thiam chantir leh ngaihdam kan nih hmain kan lo thianghlim tawh sa hle a ni ngei ang a–keimahni rilru leh thinlung leh kan thiltihte kan enmai thin nak lovah. 

Chutiang a nih chuan sakhuana hi kan mamawhte zinga a tawp ber, a laipui bera mahni indahna a lo ni daih thei ang.

A lehlamah, thiam chantirna chu a phu miah lote hnena Pathian thilthlawnpek a ni tih kan hrethiam a nih erawh chuan, mahni inen lovin, Pathian hmangaihna leh khawngaihna zawk chu kan rilrua lian ber leh en ber a ni zawk thung dawn lo’m ni?

A thuhrimin, Pathian hmangaihna leh a nungchang hi mahni felna hmachhuantu nunin nge, Pathian khawngaihna rinchhan tlattu nun zawkin lan chhuantirin kan rin le?

Rom 4:6–8 chhiar la. Engtin nge hetah hian rinnaa thiam chantîr kan nih dan chu fiah leh zualin a sawi?

“Mi sual chuan rinnain Krista hnen a pan ngei tur a ni a, a thatnate chu rin chhanin a sualte chu a phursaktu hnenah a nghat ang a, tichuan a ngaihdamna a chang bawk ang. 

Chumi atan chuan a ni Krista pawh he khawvela a lo kal reng ni.

Chutichuan, Krista felna chu a sualte sim a, amah ringtu hnenah chuan bel a ni ta a.

Lal chhungkuaa seng luh a lo ni ve ta thin a ni.”–Ellen G. White, Selected Messages, book 1, p. 215.

Chutichuan, rinna avanga chhandamna hi Juda-te tan chauh ni bik lovin, Jentail-te tan pawh a nih ve tho thu a sawi zui leh nghal bawk a (Rom 4:9–12).

Fet deuh taka sawi i phut a ni pawhin, Abrahama ngei pawh kha Juda mi a ni bik hleinem; amah thlahtute kha milem bemi an ni ve tho asin! (Josua 24:2). 

A hunlai khan “Juda” leh “Jentail” tih ang zawnga inthliar hranna a la awm lo hrim hrim a.Tin, thiam chantir a nih lai khan (Gen. 15:6) a serh pawh a la tan chuang hek lo.

Chuvangin Abrahama kha serhtante leh serhtan lohte pa a lo ni ta ve ve a, Paula pawhin chhandamna chu mi tin tan a nihzia entirna tha tak atan a hmang ta reng a ni.

Krista thihna chu mi tin tan a ni a, chi emaw, hnam emaw anga inthliar hranna engmah a awm lo (Heb. 2:9).

Kraws-a Isua thihna kha mi zawng zawng tan a ni a, Kraws khan mi tin hi kan hlu theuh a ni tih min hrilh bawk tih hi ngaihtuah la.

Chutih a nih chuan, eng vangin nge hnam emaw, chî emaw, ram emaw a dan avang maia inhmuh thiam lohna leh inrin loh sa ngawtna thleng thîn hi thil rapthlak a nih le?

Mi dangte hmuh dik loh sa ngawtna ang rilru kan neih theuhte hi Pathian khawngaihna azarah engtin nge kan paih bo theih ang?