Krista Kan Felna

Isua chu mipui hmaah a thu a, an tana thu dengkhawng tak mai ni tur hi a sawi a:

"In felnain lehkhaziaktute leh Pharisaite felna a khum loh chuan vanram in lut tawp lo ang tih ka hrilh che u a nih hi," a ti a. (Matthaia 5:20).

Dan zawm kawngah kher kher chuan Pharisaite aia zawm țha zawk tur an vang hle ang a.

Nimahsela, an nungchang chu Pathian tihlawm an tumna aiin mihring mit hmuha mawi an zawnna mai a ni zawk si a.

An tih anga ti ve lo turin Isuan min hrilh a ni. (Matthaia 6:1).

Chuti a nih si chuan, engtin nge Pathian hmaah mi fel kan nih theih ang? Inneihna ruai tehkhin thu hian felna dik tak kan hmuh theihna tur chu min kawhhmuh a.

Matthaia 22:2-14 chhiar la. Eng vangin nge lal khan a mi sawmte zawng zawng khan inneihna puan sin vek se a duh?

Kha puan khan enge a entir? Isaia 61:10, Zakaria 3:1-5 te pawh en la. Lal hian a thlawn vekin inneihna puan kha asem a. Inneihna ruai kil tura lo kalte kha kahpah taka a sawm chawpte an nih hlawm avangin inneihna puan lo nei sa pawh an awm kher lo ang a, a leina tur pawisa nei alawi pawh an awm awm lo ve.

Sawmna leh inneihna puan te kha lal thilthlawnpek liau liau a ni a.

Inneihna ruai lo kil ve tura an tih tur awm chhun chu a thilpek pahnih lo pawm mai chu a ni.

Suala Adama te an tluk tak achinah khan mihring zawng zawng hi thlarau lamah chuan saruak mai kan lo ni ta vek a.

Evi leh Adama te khan thu an zawm loh hnuin saruak an ni tih an inhria a, theipui hnah thui khawmin inkhuh an tum ta a. (Genesis 3:7); theipui hnahte chu a deh vel a nuam lovin, an taksa pawh a khuh țha thei kher lo ang.

Mihringte felna hlawh chhuah theih sang ber pawh hi "silhfen bawlhhlawh" ang lek chauh a ni a. (Isaia 64:6). ..

Tehkhin thu anih ang hian Pathian chuan kan mamawh puan chu min pe a. Evi leh Adama te tan savun kawrfual a siamsak a. (Genesis 3:21).

Kha khan a felna chuan mi sualte a khuh a ni tih a entir.
Lalpa chuan a kohhran tan Krista felna kawrfual a pe bawk a, chutichuan puan zai sin fai tak leh var taka thuam an lo ni ang a, (Thupuan 19:8),

Bawlhhlawh kai lo leh zur lo, chutiang thil reng reng pu lovin a awm thei dawn a ni. (Ephesi 5:27).

He kawrfual hi "Krista felna leh a nungchang sawisel bo chu a ni a, amah chu mimal Chhandamtua pawmtu zawng zawngte hnenah rinnain pek a ni." (Krista Tehkhin Thute p, 253)

Kan rin chu pawimawh viau tho mahse, kan chhandamna chu Kristan thilthlawn min peka kan lo inthuam avang chauha lo awm a ni tih kan hriat a ngai a. Eng vangin nge hei hi kan hriat reng a țul?