Krista Tawngtaina

Ningani zan a ni a. Zanriah Hnuhnung an kil zawh hnu chuan Isua leh a zirtirte chu Olive Tlang lam panin an kal a.

Chu mi kawngah chuan Gethsemani huan a awm a, chutah chuan Isua a lut a, ama tan leh a zirtirte tan bakah, tirhkohte thuhril ațanga amah lo la ring zel turte tan pawh a țawngțai ta a ni.

Khenbeh mai tur a ni tih inhre tho mahse, a rilru luahtu ber chu amah ni lovin, a zirtirte an ni zawk a.

Johana 17-ah hian mi dangte tana Isua țawngțaina Bible-a kan hmuh sei ber chu a lang a.

Kha mi țum khan amah ringtu zawng zawngte tan a țawngțai a, chu mi zingah chuan keini pawh hi kan tel ve a ni.

Johana 17 chhiar la. Ringtute tana Isuan a pa hnena a dilsak ber chu enge ni? Chang 21-23 hi chhiar ngun deuh bik ang che  .

Kohhran nung ni tur chuan inpumkhat a țul a. Chutiang taka pawimawh chu a nih avang chuan Isua pawh khan amah zuitute chu inpumkhat tlat se a duhzia vawi li lai a sawi nawn a ni. (Johana 17:11, 21-23).

Kha hun pawimawh tak, a hun tawp dawn hnaih ni bawkah khan thil pawimawh leh țul dang dil zawk awm tak tak pawh a nei mai thei a.

Mahse, chutiang chu dil lovin ringtute inpumkhat thei nan a țawngțai ta zawk a ni. Kohhranho tana thil hlauhawm ber chu ințhenhranna leh inepna boruak a awm palh kha a ni a.

Isua ngenna hi, an inantlan țhapna ni lovin, Amah leh Pa an inpumkhat ang bawka a zirtirte pawh an inpumkhat a ni a.

Amah leh a Pa chu mi (person) hrang, inang lo, leh hnathawh pawh hran an ni a; mahse, nihphung leh thil tumah erawh pumkhat an ni thung.

Chutiang bawk chuan keiniho pawh hi kan rilru put hmang te, kan lo chawr chhuahna te, kan tih theih zawngte leh kan hnathawh te a inang hlawm lo a; mahse, Isua Kristaah chuan kan inpumkhat tlat tur a ni.

Chutiang inpumkhatna chu keimahni duh thu-a kan neih ngawt theih a ni lo.

Nei tur chuan kan nunah Krista kan lalber-tir a ngai.

Ani chuan kan nungchang a chher a ngai a, keini pawh a thu thua awm tura kan inpek a țul bawk.

Inpumkhatna hrim hrim chu a tawpna a ni lo. Krista chu khawvel Chhandamtu atana Pa-in a tirh a ni tih ring ve tura khawvel hriattirtu a ni a.

Rilru sukthlek inang lo tak takte zinga inlungrualna leh inpumkhatna lo thleng țhin hi mi sualte chhandam turin Pathianin a Fapa a rawn tir a ni tih puangtu a ni a.

Krista chhandamna leh chu mi zara siam danglamna thiltihtheihzia hnial rual loa lantirtu a ni bawk. Chu mi hriatpuitu kan ni chu kan vannei hle a ni. *_Mahni hmasialna hian inpumkhatna a tiderthawng fo mai a. Engtin nge inpumkhatna tichhetu ni lo tura kan inven theih ang?