December ni 25 hi Isua pian ni tak tak a ni lo tih hi khawvela Krismass lawmtu tam zawk hian kan hre awm e.
Isua pian ni dik tak hi thup a ni a, hriat a ni ngai bawk hek lo vang.
A pian ni dik tak hriat ni se chuan khatih hun laia lal, Heroda khan mipa naupang kum 2 tling chin thahtir lovin, Isua pian nia piang mipa naupang zawng a thahtir mai ang.
Khawvel Kristian tam zawkin he hun hi Krista pian lawm nan an hman miau si avangin do bur pawh ni ila kawngro a su tam pui lo vang.
Lalpa zawlnei Ellen G. White-i chuan, "Krismas hi khawvel Chhandamtu a piang a ni tih hriat reng nana lawm a ni tih i theihnghilh lo vang u," tiin a ziak hial a.
Chuvangin, December 25 hi Isua pian ni, ni serh anga lawmna siam lovin, khawvel Chhandamtu (Isua) a piang a ni tih hriat reng nana lawm tur zawk a ni.
He ni hi ni serh anga neih chu thil dik a ni hauh lo, mahse, khawvelin Bethlehem-a nau piang, Isua a thlir thup lai hian Krista hmangaihna leh leia a lo pian dan puan nan he hun hi hman thiam a pawimawh hle a ni.
Krista chu chawimawi a nih a, keini leh mi dangte tan malsawmna a nih dawn phawt chuan Krismas lawmna program neih hi a pawina a awm lo. Lalpa zawlnei,
Ellen G. White-in hetiang hian a ziak a:
"Unaute u, Krismas lawmna hi nangmahni leh midangte tana malsawmna a nih theih nan siam/lawm turin ka ngen a che u,"
Tin, "Krismas leh kum thar lawmna hi mi rethei tanpui ngaite pualin neih tur a ni," tih leh, "Krismas chu Isua tana thilpek ken hun special tak a ni tur a ni.
Chung thilpekte chu mi dangte chhandamna tura hman turin luanchhuahtir tur a ni," tihte hi kan hriat a tha hle a ni.
(E G. White, Review and Herold, November 21, 1878 par.2._Reflecting Christ, page 373,2._Adventist Home, p. 482,3.)
No comments:
Post a Comment