Tisa Thiltihte Chu

TÎSA THILTIHTE CHU

Tîsâ leh Thlarau inbeih tawn reng thu a sawi hnuah Galatia 5:18–26-ah hian hêng nihphung pahnihte inan lohna chu a thiltihte ve ve-te târlangin a sawi zau leh ta a.

Hetianga thil ţha emaw, thil ţha lo emaw ziah tlar duat hi Juda-te leh Greco-Romean te thuziakah chuan thil pangngai tak a ni rêng a. Paula thil ziah pawh hian kan pumpelh tûr nungchang țha lo leh neih ve kan tum tûr nungchang dikte chu min hrilh a ni.

A hnuaia Bible châng târlanten nungchang țha leh nungchang țha lo an sawite hi ngun takin chhiar la. Engtiang kawngin nge Galatia 5:19–24-a Paula sawi leh hêng chângten an sawi hi a inan a, a danglam bawk sawi rawh. Jeremia 7:9; Hosea 4:2; Marka 7:21, 22; 1 Timothea 3:2, 3; 1 Petera 4:3; Thupuan 21:8. ___________________________________ ________________________________________________________________________

Paula hian mi dangten nungchang țha leh nungchang țha lo hrang hrang an ziah chhuahte hi a hre chiang ve tho nachungin, Galatia Lehkhathawna a hman dân nên hi chuan danglamna lian tak tak a awm a.

A hmasa berah chuan, Paula hian hêng nungchang chi hnihte in an lohna hi sawi ve tho mah se, a sawi dân phung erawh a inang lo va. Nungchang țha lote chu “tisa thiltihte” tiin a sawi a, nungchang țhate erawh chu “Thlaraurah” tiin a sawi ve thung.

Hêng nungchang pahnihte inan lohna hi hriatthiam a pawimawh hle mai. James D.G. Dunn-a chuan ti hian a lo ziak a:
“Tîsâ chuan thil phût a nei a,
Thlarau erawh chuan a pe chhuak thung.

A hmasa zâwk hi chuan mahni châk zâwng leh duhzâwng ringawt a ngaihtuah a, a hnuhnûng zâwk erawh hi chuan mi dangte a ngaihsak a, a dam thlap a, a dawhthei a, a rintlâk êm êm bawk. Pakhat hian mihringin kan duhzâwng anga thil kan sîksâwi nasat țhinzia a tilang a, pakhat dang hi chuan Pathianin min țanpui a, chhûng lama siam tharna hi nungchang rintlâk neih theihna hnâr a ni tih min hriattîr ve thung a ni.”—The Epistle to the Galatia, p.308.

Nungchang țha leh nungchang țha lo a ziah chhuahte danglamna lian tak dang leh chu nungchang țha lote hi pakhat chauh anga sawiin, “tisa thiltihte” a ti a. Nungchang țha erawh chu pakhat anga sawiin, “Thlarau rah” a ti mai thung. Heta țang pawh hian tisaa nun chuan ințhenhranna, buaina, innghirnghona, leh inpumkhat lohna bâk a thlen thei lo tih a lang reng mai a. Chutih laiin, Thlarauva nunna erawh chuan Thlarau rah pakhat a chhuah ve thung a, chu chuan inpumkhatna thlentu nungchang pakua a lantîr ve leh chhâwng țhîn a ni.

Hetiang hi a nih avângin, mi țhenkhat chuan Pathian chungchâng kanrin dân chu thil pawimawh ber a ni lo, kan tih tak phawt chuan a țha vek tiin an sawi mai țhîn a.

Mahse a dik hauh lo. Paulan nungchang țha lo a ziah chhuahte hian chumi leh ling chiah chu a nihzia a tilang zâwk a: Pathian chungchânga ngaihdân dik lo neihna chuan mipat hmeichhiatna hman khaw lohnaah leh sakhaw biak dân dik lovah mi a hruai lût țhîn a, chu chuan mihringte inlaichînna a tikehchhe vek țhîn. Chu mai pawh ni lovin, nunna hial pawh minchantîr thei bawk (Gal. 5:21).

Paulan “tîsa thiltihte” tia a sawi hi en la. A zavai hian Thu Sâwm Pêka a khawi emaw ber tal bawhchhiatna a ni zêl tih i hmu thiam em?